१
Advertisement
अविरल वर्षासँगै कर्णाली राजमार्गअन्तर्गत विभिन्न स्थानमा पहिरो खसेपछि राजमार्गको आवागमन प्रभावित भएको छ। पहिरोका कारण सडकका विभिन्न खण्डमा क्षति पुगेपछि आइतबार बेलुकी देखि यातायात सञ्चालनमा समस्या भएको हो।
राजमार्गमा खसेको पहिरो पन्छाउने तथा क्षतिग्रस्त सडक मर्मत गर्ने काम भइरहेको भए पनि सडक पूर्ण रूपमा सञ्चालनमा आउन केही समय लाग्ने जिल्ला प्रशासन कार्यालय जुम्लाले जनाएको छ। सडकको अवस्था र पहिरोको प्रकृति हेर्दा तत्कालै सबै स्थानमा यातायात सहज बनाउन कठिनाइ रहेको प्रशासनको भनाइ छ।
जुम्लाका प्रमुख जिल्ला अधिकारी तेज प्रकाश प्रसाईंका अनुसार कर्णाली राजमार्गका विभिन्न स्थानमा पहिरोका कारण सडक अवरुद्ध भएको छ। सडक खुलाउन सम्बन्धित निकायसँग समन्वय भइरहेको र आवश्यक मेसिन तथा जनशक्ति परिचालन गरेर पहिरो पन्छाउने कामलाई तीव्रता दिइएको उनले बताए । ‘राजमार्गका विभिन्न स्थानमा पहिरो गएको छ। सडक खुलाउने काम भइरहेको छ। तर, कतिपय स्थानमा सडकमा क्षति पुगेकाले पूर्ण रूपमा सञ्चालनमा आउन केही दिन लाग्न सक्छ’, प्रमुख जिल्ला अधिकारी प्रसाईंले बताए ।
उनका अनुसार पहिरो पन्छाएर सडक सञ्चालनमा ल्याउने काम भइरहे पनि वर्षा भइरहेका कारण थप पहिरो खस्ने जोखिम कायमै छ। त्यसैले सडक खुलाउने काममा पनि मौसमको अवस्थाले प्रभाव पार्न सक्ने प्रशासनले जनाएको छ।
यात्रु र मालवाहक सवारीलाई सावधानी
राजमार्ग अवरुद्ध भएपछि जुम्ला तथा कर्णालीका अन्य जिल्लातर्फ आवतजावत गर्ने यात्रु र मालवाहक सवारीसाधन प्रभावित भएका छन्। सडकको अवस्था यकिन नगरी यात्रा गर्दा बीच बाटोमै सवारीसाधन रोकिएर यात्रु तथा चालक समस्यामा पर्न सक्ने भएकाले सावधानी अपनाउन प्रशासनले आग्रह गरेको छ।
विशेषगरी कर्णाली राजमार्गमा वर्षायाममा पहिरोको जोखिम उच्च हुने भएकाले यात्रा गर्नुअघि सम्बन्धित निकायसँग सडकको अवस्थाबारे जानकारी लिन अनुरोध गरिएको छ।
प्रमुख जिल्ला अधिकारी प्रसाईंले सडक डिभिजन कार्यालय जुम्लासँग समन्वय गरेर मात्रै यात्रा तथा मालसामान ढुवानी गर्न आग्रह गरेका छन्। सडक खुलाउने काम भइरहेकाले कुन स्थानमा यातायात सञ्चालन भइरहेको छ र कुन स्थानमा अवरोध छ भन्ने जानकारी लिएर मात्रै सवारी सञ्चालन गर्न उनले अनुरोध गरेका हुन्।
सडक खुलाउन मेसिन र जनशक्ति परिचालन
अवरुद्ध सडकखण्डमा पहिरो हटाउन सडक डिभिजन कार्यालय तथा सम्बन्धित निकायबाट आवश्यक मेसिन र जनशक्ति परिचालन गरिएको छ। पहिरो पन्छाउनेसँगै क्षतिग्रस्त सडकको अवस्था हेरेर आवश्यक मर्मत गर्ने कामसमेत अघि बढाइएको छ।
तर, कतिपय स्थानमा सडक नै क्षतिग्रस्त भएको र माथिबाट निरन्तर ढुंगा-माटो खस्ने अवस्था रहेकाले काम चुनौतीपूर्ण बनेको बताइएको छ। पहिरो पन्छाएर सडक खुलाएपछि पनि पुन: पहिरो खस्ने जोखिम रहेकाले सडक पूर्ण रूपमा सुरक्षित नभएसम्म यात्रु तथा चालकलाई सावधानी अपनाउन आग्रह गरिएको छ।
कर्णाली राजमार्गमा बर्खाको समयमा पटक-पटक पहिरो जाने समस्या देखिँदै आएको छ। पछिल्ला वर्षहरूमा पनि राजमार्गका गगनेखोला, पिली, मोल्फा, एस मोडलगायतका स्थानमा पहिरोका कारण यातायात अवरुद्ध हुँदै आएको समाचार सार्वजनिक भएका छन्।
सडक डिभिजन कार्यालय जुम्लाका अनुसार दैलेखको दहीखोलादेखि जुम्ला सदरमुकाम खलंगासम्मको सडकखण्डमा विभिन्न स्थान पहिरोको जोखिममा छन्। वर्षायाममा राजमार्गमा पहिरो खस्ने क्रम बढ्दा यात्रु तथा मालवाहक सवारीसाधनले पटक-पटक समस्या भोग्दै आएका छन्।
सडकको अवस्थाबारे जानकारी लिएर मात्रै यात्रा गर्न आग्रह
जिल्ला प्रशासन कार्यालय जुम्लाले राजमार्गमा यात्रा गर्ने नागरिकलाई सडकको पछिल्लो अवस्थाबारे जानकारी लिएर मात्रै यात्रा गर्न आग्रह गरेको छ। सडक खुलाउने काम भइरहेको अवस्थामा जबर्जस्ती सवारीसाधन अघि बढाउँदा जोखिम हुन सक्ने भएकाले सम्बन्धित निकायको समन्वयमा मात्रै यात्रा गर्न भनिएको हो।
मालसामान ढुवानी गर्ने व्यवसायी तथा चालकलाई पनि सडक खुलेको जानकारी नआएसम्म सवारीसाधन नचलाउन अनुरोध गरिएको छ। विशेषगरी लामो दूरीका मालवाहक सवारीसाधनले बीच बाटोमा लामो समय रोकिनुपर्ने अवस्था आउन सक्ने भएकाले पूर्वजानकारी लिएर मात्रै यात्रा गर्न प्रशासनले आग्रह गरेको छ।
राजमार्ग सञ्चालनका लागि सडक डिभिजन कार्यालय, जिल्ला प्रशासन र सुरक्षा निकायबीच आवश्यक समन्वय भइरहेको प्रमुख जिल्ला अधिकारी प्रसाईंले बताए। सडक खुलाउने कामलाई प्राथमिकताका साथ अघि बढाइएको र अवस्था सामान्य भएपछि नियमित रूपमा यातायात सञ्चालन हुने उनले जानकारी दिए ।
