प्रथम नगर स्तरिय मेयर कप कार्यक्रम सम्पन्न

पूर्व खेलाडी समाज बाँकेले संचालन गरेका प्रथम नगर स्तरिय मेयर कप कार्यक्रम सम्पन्न भएको छ ।

सो खेल प्रथम नगर मावि स्तरीय मेयर कप महिला तथा पुरुष भलिबल प्रतियोगितामा आर्दश मावि र धम्बोझी माविले उपाधि प्राप्त गर्न सफल भएका छन् । प्रतियोगितामा महिलातर्फ आर्दश मावि नेपालगन्ज र पुरुषतर्फ धम्बोझी माविले उपाधि जितेका हुन् ।

बाँके नेपालगन्जको रंगशालास्थित कबर्ड हलमा सम्पन्न भएको महिला भलिबलको फाईनल खेलमा आदर्श माविले युनाईटेड एजुकेशनल एकेडेमीलाई २५–१६, २५–१३ ले पराजित गर्दै प्रथम हुन सफल भयो । युनाईटेडले उपविजेतामै चित्त बुझायो । जयबागेश्वरी माविले सगरमाथा माविलाई २५–१९, २५–१६ ले पराजित गरेर तेस्रो भयो । यस्तै पुरुषतर्फ धम्बोजी माविले जय जनता मावि थपुवालाई २५–१६, २५–१६ ले पराजित गर्दै उपाधि जित्यो । यसैगरी मंगल प्रसाद माविले युनाईटेडलाई २५(१८, २४–२६ र २५–२२ ले पराजित गरेर तेस्रो भयो ।

दुबै इभेन्टमा प्रथम हुने टिमले नगद २० हजार, दोस्रो हुने टिमले नगद १५ हजार र तेस्रो हुनेले नगद १० हजार सहित ट्रफी, मेडल र प्रमाणपत्र प्राप्त गरेका छन् ।
विजयी हुने टिमलाई समापन कार्यक्रमका प्रमुख अतिथी एवम् नेपालगन्ज उप(महानगरपालिकाका मेयर प्रशान्त बिष्ट, लुम्बिनी प्रदेशका पुर्बमन्त्री एवम ओलम्पियन सुरेन्द्र हमाल, समाजका कार्यबाहक अध्यक्ष निजामुद्दिन सिद्दिकी, ओलम्पियन पार्वती थापा लगायतले पुरस्कार, ट्रफी तथा प्रमाणपत्र वितरण गर्नुभएको थियो ।

पूर्व खेलाडी समाज बाँकेको आयोजना तथा नेपालगन्ज उपमहानगरपालिकाको सहयोगमा प्रतियोगिता सञ्चालन गरिएको थियो । प्रतियोगितामा नेपालगन्ज उपमहानगर क्षेत्रका १३ वटा विद्यालयका पुरुषतर्फ १० र महिलातर्फ १० गरि कुल २० वटा टिमको सहभागिता रहेको समाजका सचिव नरेन्द्र थापाले जानकारी दिनुभएको छ ।